Category newpost

Garoowe: 02 March 2023: Guddoomiyaha Degmada Garoowe Mudane Cabdiqaadir Maxamed Maxamuud Geeddi, ayaa maanta iska diiwaangeliyay Degmada Garoowe oo ay si rasmi ah uga bilowmatay Is-diiwaangelinta Codbixiyeyaasha Doorashada Goleyaasha deegaanka ee Puntland.

Guddoomiyaha ayaa sheegay in ay maanta tahay maalin taariikhi ah oo dadka ku dhaqan Caasimadda Garoowe ay isu diiwaangelinayaan si ay codkooda ugu doortaan xubnaha ku metelaya Golaha deegaanka ee soo socda, sidaasi darteed wuxuu ku baaqay in la is-diiwaangeliyo.

“Waxaan ku faraxsanahay in aan maanta iska diiwaangeliyay Caasimadda Garoowe, si aan codkayga u dhiibto Doorashada Golaha deegaanka ee Degmada , Runtii maanta waa maalin taariikhi u ah Bulshada ku dhaqan Caasimadda Garoowe, waxay dadku isu-diiwaangeliyaan si ay codkooda ugu doortaan xubnaha ku metelaya Golaha deegaanka ee Degmada Garoowe.

Waxaan ku booraniyaa dadweynaha Garoowe iyo deegaannada hoos yimaada in ay is diiwaangeliyaan, waayo qofka Hadda is diiwaangeliya ayaa maalinta Doorashada Codeynaya, Waa fursad dahabi ah oo dadka loogu dhoweynayo awooda ha laga faa’ideysto Bulshooy.

Isdiiwaangeli maanta si aad Berito u codeyso!” Ayuu yiri Guddoomiyaha Degmada Garoowe, Mudane Geeddi.

Is-diiwaangelinta Doorashada Golaha deegaanka ayaa maanta si rasmi ah uga bilowmatay Garoowe, waxaana munaasabadda daah-furka ka qeybgalay Guddiga Doorashooyinka, Xubnaha Goleyaasha ee ku shaqo leh, Maamulka Gobolka , Maamulka Degmada, Saraakiisha Ciidanka, Ururada Bulshada, Hay’adaha ka shaqeynaya wacygelinta iyo korjoogto kala duwan.

DHAMMAAD.

Waxaan ka tacsiyeeynaya geerida Alle ha u naxariistee Cabdifataax Maxamed Shire , oo ahaa Xoghayihii guud ee xafiiska Madaxweyne ku-xigeenka Dowladda Puntland oo maanta Garoowe ku geeriyooday. Wuxuu ahaa masuul usoo shaqeeyay Dalka iyo dadkiisa oo xafiiskaasi joogay in ka badan 10sano , si gaar ah waxaan usoo wadashaqeynay muddadii aan ahaa Agaasimaha Maamulka Madaxtooyada.

Marxuumka Alle janadii ha geeyo ehelkiisii iyo qoyskiisiina Samir iyo Iimaan Alle ha kasiiyo, Waxaan si gaar ah ugu tacsiyeynayaa Madaxweyne Ku-Xigeenka Dowladda Puntland iyo guud ahaan Shaqaalaha Madaxtooyada.

Guddoomiyaha Degmada Garoowe Mudane Hon Abdulkadir Geedi ayaa maanta oo taariikhdu tahay 15 January 2023 iska diiwaangeliyay Urur Siyaasadeedka (KAAH).

Xoghayaha dowladda hoose Garowe Maxamuud Cali Xasan Guray ayaa ka warbixiyay ahmiyadda ay leedahay shaqada waddo bixinta ee ka socota xaafadda Halgan, si la isugu xiro wadddooyinka magaalada gudaheeda iyo kuwa bannaanka laga wado.

Shacabka ku nool xaafadda Waaberi ee magaalada Garowe, ayaa soo dhoweeyay waddo laami ah oo casri ah oo dowladda hoose ee degmada Garowe ay ka dhisayso xaafaddaas.

Waxay shacabku sheegeen inay xaafadda Waaberi oo kamid ah xaafaddaha ugu waawayn caasimadda ay baahi weyn u qabtay waddadan laamiga ah oo hadda meel wanaagsan maraysa.

Dowladda hoose ee Garowe oo ka faa’idaysanaysa maalgalinta mashaariicda World Bank waxay dadaal xooggan ku bixisay in caasimaddu yeelato waddooyin casri ah oo jiritaankoodu uu qaato muddo boqolaal sano in laga faa’idaysto.

Degmadu waxay sidoo kale waddaa in dib loo dayactiro loona casriyayeeyo waddooyinka horey loo dhisay ee uu maalgaliyay mashruuca JPLG, waxaana hadda lagu billaabay jidka soddonka oo la saarayo laami cusub, kii horena waa la qaadayaa.

Shacabka Garowe iyo dowladda hoose ee Garowe ayaa iska kaashaday maalgalinta jidkan.

Doorashadii 8-aad ee xaafaddaha Garowe ayaa maanta laga qabtay xaafadda Hodan, waxaana lagu doortay guddoomiye cusub iyo ku xigeen cusub, kadib doorasho aad loogu loolamay oo musharraxiintii ugu badnaa ee ay ku tartameen xilka guddoomiyaha iyo ku xigeenka.

Waxaa guddoomiyaha xaafadda Hodan loo doortay Cabdulqaadir Cabdullaahi Xasan, oo ay afar musharrax kula tarmayeen halka ku xigeenka loo doortay Faadumo Maxamuud Maxamed oo ay la tartamayeen labo musharrax.